Muqdisho,(insidesomalia.org)- Raysalwasaaraha Dawladda Faderaalka KMG ah ee Soomaaliya Nuur Xasan Xuseen ayaa ka hadlay Doorashada dhawaan laga sameyn doono Magaalada Muqdisho ee Caasumada Soomaaliya, taasoo lugu soo dooran doono si xor ah Maamulka Gobalka Banaadir.

Raysalwasaaraha Soomaaliya ayaa ugu baaqay Shacabkii ka baxay Magaalada Muqdisho in ay dib ugu soo laabtaan Magaalada Muqdisho, wuxuuna sidoo kale ugu baaqay Duubabka dhaqanka in ay ka tashadaan xubnaha ay usoo dooranayaan maamulka gobalka Banaadir.

Nuur Cadde wuxuu tibaaxay in ay doorashadaasi ku dhici doonto si Cadaalad ah, wuxuuna fariintiisan ku soo beegay xili ay dad badan isweydiinayaan qaabka Doorashada, inkastoo uu Nuur Cadde sheegay in ay doorashadan noqon doonto mid si cadaalad ah ku dhici doonta.

Odayaasha ku dhaqan Magaalada Muqdisho ee dhalasho ahaan ka soo jeeda ayaa goor horeba galay kala xulida xubno doonaya in ay helaan codka beeshooda, waxaana lugu xirayaa oo qof walba xadidoona Sharuudihii shalay ka soo baxay Madaxtooyada Soomaaliya.

Wasiirka koowaad ee dawladda Soomaaliya Col. Nuur Xasan Xuseen ayaa hadalkiisa ku soo beegmayaah xili ay Xubnihii hore ee Maamulka Gobalka Banaadir qaarkood ku dhawaaqen in ay doonayaan in ay xilkaasi isku soo taagaan.